奧運添好運

添好運 - 一間以即叫即蒸點心打響名堂的食店，分店愈開愈多，水準卻... 還是當初總店的味道最好! 雖然分店味道不及最初的總店，但點心仍是不錯的，而且坐得較舒服，所以今日兩口子去開奧海城有點事要辦，還是"中"了入去添好運嘆番一盅兩件。

菠蘿叉燒包是我在添好運的至愛:

蝦餃都ok，都算皮薄餡靚:

鳳爪排骨飯只能説普通啦:

千萬千萬要記住這碟咸水角:

其實之前已吃過，嗰皮又厚又硬超少餡，超級唔掂，彭主席好鍾意食咸水角，所以唔記得今次又點了，結果第二次居然能"保持水準"，同樣是又厚又硬超少餡，真的不想再給第三次機會了!

撇除那碟又再中伏的咸水角，我是幾喜歡這種即叫即蒸點心小店的，尤其這種寒風颯颯的天氣，在溫暖的室內嘆番一盎兩件，很老人家的喜好，但我喜歡。

{www.facebook.com/Kisskidsfamily}

少女的甜品 - baby Mon cher Cafe@Sogo

今日趁孖寶返了學，溜了去Sogo週年慶湊熱鬧，買吓啲兒童用品外，亦為自己的化妝品入吓貨。

自己買得高興之餘，當然亦唔會忘記孖寶的課後茶點；用中國銀行Sogo信用卡，除了之前我在www.facebook.com/Kisskidsfamily的"購物小情報"提過買某些名牌化妝品有等於95折的現金回贈外，這間位於地庫的baby Mon cher Cafe也有此優惠，週年慶期間還有額外9折呢:

睇孖寶個開心樣，就知道佢哋有幾like Mami買俾佢哋嘅茶點啦! 心肝女兒的My Melody由白朱古力整成，而寶貝兒子的黑人Hello Kitty則由啡色朱古力整成，兩款糕點賣相都算吸引(當然白色Melody比變啡了的Hello Kitty外型較討人歡喜)，入面的蛋糕入口幼滑而鬆軟，出面的忌廉則口味清新而不太甜膩，啱哂我哋呢啲喜歡精緻甜品嘅"少女"，嘻嘻!

我食嗰款叫"幸福御守"，是黃色薄皮包著忌廉的"大雲呑":

啲皮夠薄，忌廉夠滑，能夠興高采烈地同寶貝們品嚐啖啖忌廉的香滑而不怕肥, 都算幾幸福嘅!

小朋友好玩、大人又有得著的體驗之旅

今日好高興得到Yes-Parents.com的邀請，參與DPM Dr. Pillow & Mattress「點對點™」床褥體驗之旅。

點解我會咁有興趣參加呢? 全因自己骨骼精奇，條脊骨孤度同一般人唔同，所以比較容易有腰酸背痛，亦因為咁，我會特別注意脊骨健康嘅資訊，尤其是孖寶成長過程中對脊骨的保護，更是我所關注的，而今次DPM搞嘅博客活動，會有脊柱側彎主題分享和物理治療師顧問服務，啱哂我去聽，亦值得同大家分享下。

DPM專店就在尖沙咀漢口中心203-206室，地點方便，但不是街舖，如非得Yes-Parents邀請，也不知雅芳婷集團有此DPM專店呢! 不過樓上舖有樣好，私隱度高，瞓上去試床褥時比較自由自在、無拘無束；而且這間DPM專店設計得很cozy，小朋友"被測試"得很開心，一見床就衝上去瞓呀～

係喎，瞓咗咁耐，都未講測試啲乜呢? 就係普通床褥和DPM「點對點™感應系統」床褥的壓力測試。

測試很簡單，小朋友只要分別仰睡和側睡在普通床褥和DPM「點對點™感應系統」床褥上，電腦會顯示他們睡覺時身體最受壓力的地方為紅色，壓力較平均分佈的地方則是藍色而且圖型會較完整。

家姐的壓力測試(左面Normal是普通床褥，右面Bed 2是DPM「點對點™」床褥):

細佬的壓力測試(左面Normal是普通床褥，右面Bed 2是DPM「點對點™」床褥):

測試結果當然是無論仰睡或側睡，DPM「點對點™」床褥的壓力分佈都較平均，身體可緊貼床褥的範圍也較多，表示床褥更可平均支撐全身的重量。

測試結果沒有太大驚喜，反而是測試過程DPM做得很好，值得一提。

大家都知喇，小朋友唔係你叫佢瞓就瞓，企就企㗎嘛，DPM的團隊在這方面很會氹小朋友，令整個過程進行得很愉快順利:

玩完測試，輪到脊柱側彎主題分享:

雖然老生常談，但係聽完分享會確實會多啲提醒自己唔好做咁多低頭族和唔好蹺腿。

因為我自己有扁平足，一講到這個題目，立即豎起耳朵聽，問答環節彭主席更踴躍舉手，贏得肩頸枕一個，加埋DPM送給每個小朋友的聖誕禮物(摩登絲毛巾)和護脊資訊，這次活動真係滿載而歸:

分享會期間，小朋友坐唔定，幸好DPM安排了放映壞蛋獎門人和白畫板，令小鬼們安定下來:

另外他們亦很細心，為此次活動安排了茶點，佈置得很有聖誕氣氛之餘又唔驚餓親大小朋友：

最後是單對單的物理治療師顧問服務，我們當然把握機會，問得就問，尤其是怕脊椎弧度不夠的問題:

幸好物理治療師說這弧度尚算在正常的範圍，不用擔心。

上圖家姐仔背後便可看到DPM「點對點™感應系統」的內裏乾坤，如何做到在小朋友的成長期間，由小童變中童，它都可以逐格追蹤睡眠時的壓力點及需承托的位置，不用擔心買咗好快唔啱用的問題。

今次整個活動過程絶無hard-sell成份，大人聽得舒服，小朋友玩得開心，雖然冇令我哋立即買張床褥返屋企，但係就留下深刻印象，以後如果想幫小孩換床褥，我會即時諗起DPM「點對點™」床褥，與其唔知市面邊隻好，不如相信有科學根據的，俾小朋友瞓都安心啲吖。

大家miss咗冇得參與這次活動唔緊要, 因為DPM由即日起至2014年12月31日期間, 凡預約體驗者, 均有機會獲得商務印書館HK$100書劵(先到先得, 送完即止), 詳情請登入:
http://goo.gl/0jqi06

又有得玩體驗, 又有書劵送, 超筍!

韓流襲港 - Cosmetics篇

講化妝，我絕對唔係專家，唔識畫眼線又唔識黐假眼睫毛，但係都鍾意靚O架嘛, 出街都會搽BB cream、concealer及2-way cake，可改善吓面無血色的面色和遮瑕外，亦可當防曬之用。

今次試用的是HERA的CC cream(其實想買遮瑕度較高的BB cream，但唔記得做乜買咗CC cream-_-"):

第一下搽時會覺得有點杰，但推開後便ok，都算容易推得均勻。

之後我會用Giorgio Armani嘅Concealer遮吓啲黑眼圈呀、雀斑呀咁，等我用完G.A.，又物色吓試哪隻韓貨先得;-)

LUNA two-way cake，好用，令妝容更亮麗持久:

最後用Bobbi Brown眉粉和胭脂上色，當然仲有我之前介紹過的似有還無潤澤雙唇的lipstick，大家會睇到妝前妝後的分別:

HERA和LUNA都做到韓妹亮麗自然的裸妝效果! 韓妹上身, 呵!呵!呵!

{www.facebook.com/Kisskidsfamily}

韓流襲港 - skincare篇

天文台話未來數日將會有寒流襲港，市區氣溫可能會降至10度或以下，大家要做好禦寒措施，唔好冷親；而今次CEO想講嘅"韓流"，襲港襲咗好耐，身邊親友紛紛被"韓風"入侵，上至韓劇、韓星和k-pop，下至美容、化妝和fashion，只要是來自大韓民國的，大家都趨之若䳱，韓風大行其道，CEO都忍唔住"韓妺上身"，積極試吓各種韓貨，趁這個月尾去高麗國時湊吓熱鬧入番啲貨。

先講"媽士"，這款Nature Republic的Royal Jelly Mask, 敷時真的有濃濃的honey香甜味，好想伸條脷出嚟舔自己塊面啲蜜糖，感覺好滋潤。敷完之後都ok，但有少少"笠"，而且輸了給下面的面膜，原因是敷完後肌膚沒有亮白感覺! 不過對於不喜美白，喜歡健康蜜糖膚色的mm，這隻mask啱哂佢哋!

暫時試過數款面膜，最值得推介的是好友介紹給我的SKIN CERAMIC的Donkey Milk Hydrogel Mask Pack:

它不是paper mask，而是像凝膠，亦因為這種貼面質地，要一敷便敷啱位置，落位要準確，否則好易弄破面膜。

圖右上角是敷完"媽士"的第二日，好似真係白滑咗! 唯一缺點係塊mask會蓋住鼻孔位置，一呼一吸時塊"媽士"會在呼吸位置起伏，要自己好小心拉高鼻子位置(一不小心好容易會整爛)。驢奶mask比Tonymoly蝸牛面膜貴一點，但效果好很多哩!

想經濟一點，L'AFFAIR的"媽士"也不錯，只是驢奶mask的三成，效果不如驢奶mask亮白，但作簡單補濕是一個不錯而又實惠的選擇。

不知是否心理因素，總覺得女人要多啲骨膠原，所以數款面膜中特別鍾情Collagen Mask!

除了"媽士"，還有充滿高麗國宮廷feel的The history of 后。Whoo嘅產品啲名好難記，我試了搽在爽膚水之前的Soon Hwan Essence秘貼，搽在爽膚水之後的Ja Saeng Essence秘貼，拱辰享Qi & Jin Eye Cream(眼霜) 和 拱辰享Qi & Jin Cream(面霜):

試後感覺確係堅，真的可以做到潤而不膩，塗抹時順滑非常的感覺，很適合冬天乾燥缺水的皮膚，或是有番咁上下肌齡的女士，尤其是拱辰享Qi & Jin Cream，人蔘香味撲鼻，增添了高貴典雅之感。不過可能太補關係，試用兩日後在面頰上長了一粒小小的酒米，但卻又真的撫平了細紋!

講講吓好長篇，cut一cut先，今篇主力講skincare，留番cosmetics下篇再講～

{www.facebook.com/Kisskidsfamily}

九龍城舊式小店 - 牛記清湯腩

某日閒逛九龍城，少爺仔瞓醒肚餓，唔知有乜好食，路經一舊式街坊麵舖，見門口有一張陳年影帝周潤發合照，好啦，陪太子讀書，呀，唔係，係陪太子食嘢，即管試吓這間牛記清湯腩啦。

諗緊食乜期間，見不時有人入來問仲有冇崩砂腩，睇吓菜牌，原來每日限量供應，一於㸃崩砂腩先:

又真係幾好味噃! 崩砂腩腍得來有點煙靭，湯底清得嚟夾雜陣陣牛腩香，很清甜。

彭少爺的雙丸河食到津津有味，都幾好，就是那種傳統的雙丸河味道。

支持舊式小店 - 九龍城牛記清湯腩!

{www.facebook.com/Kisskidsfamily}

澳洲牛奶公司接班人 - 九龍城聯發

上篇介紹過鏞記後人的甘牌燒鵝，今次講的同是"名牌"的繼承人，不記得是第二、還是第三代的澳洲牛奶公司 - 聯發。

九龍城侯王道的聯發，裝修貫設了佐敦澳洲牛奶公司的風格，不過比澳牛更乾淨企理。

總之，麵包和澳洲牛奶公司一樣鬆軟厚切，炒蛋一樣香滑，牛意差不多味道，奶茶ok，紅豆冰好飲(唔記得澳牛有冇紅豆冰飲)，略嫌啲紅豆硬了點, 老闆話一水水紅豆, 座位舒服過澳牛，職員態度更好過澳牛多多聲，沒有澳牛的人龍，一切更美好；識吃，除非經過佐敦先去澳牛，否則一定去聯發。

{www.facebook.com/Kisskidsfamily}